Tit 3 | BCO | STEP | Taitus giyo꞉ Kilit Keliso kaluka꞉isalemo꞉ a꞉widakiyo꞉, iliyo꞉ gamani misa꞉ kalu amisa꞉n misa꞉ kalu o꞉lia꞉ma꞉ ha꞉ga dowaki, ililo꞉ to sa꞉lab a꞉no꞉ kudu hamana꞉ki wida꞉bi. Kaluka꞉isaleyo꞉ ho꞉leno꞉ tambo man nafa dimidaki kudu hamana꞉ki wida꞉bi.

Titus 3

Man nafale dimida꞉bi

1 Taitus giyo꞉ Kilit Keliso kaluka꞉isalemo꞉ a꞉widakiyo꞉, iliyo꞉ gamani misa꞉ kalu amisa꞉n misa꞉ kalu o꞉lia꞉ma꞉ ha꞉ga dowaki, ililo꞉ to sa꞉lab a꞉no꞉ kudu hamana꞉ki wida꞉bi. Kaluka꞉isaleyo꞉ ho꞉leno꞉ tambo man nafa dimidaki kudu hamana꞉ki wida꞉bi. 2 Kaluka꞉isale iliyo꞉ nolo꞉ mo꞉sada꞉daki, ha꞉sa doma꞉ki wida꞉bi. Inin wiyo꞉ mo꞉wabudakiyo꞉, kaluka꞉isale wo꞉ tambomo꞉wo꞉ ege doma꞉kiyo꞉ wida꞉bi.

3 Nio꞉lo꞉ tamin amio꞉ babale dowaki, to sa꞉labo꞉ mo꞉kudu ha꞉na꞉sen. Nilo꞉ dikidab a꞉ma꞉ towo꞉ tilida꞉da꞉ga꞉yo꞉ kuduha꞉na꞉sen. A꞉la꞉ta꞉ga꞉ man ko꞉li ko꞉lilo꞉, nili do꞉mo꞉wa꞉lo꞉ asulan o꞉lia꞉ nili sagalakilo꞉ dimida꞉sen a꞉no꞉lia꞉ma꞉yo꞉, nio꞉ meya꞉ melo꞉ o꞉ngo꞉ a꞉ma꞉ susululia꞉ga꞉ ha꞉na꞉len. Nio꞉ ho꞉leno꞉ tambo man mogago꞉ dimida꞉likiyo꞉, nol o꞉lia꞉yo꞉ entea꞉liki mobea꞉sen. A꞉la꞉ta꞉ga꞉ kaluka꞉isale nolba꞉yo꞉ nimo꞉wo꞉ kulufeyab amio꞉, niliyo꞉lo꞉ imo꞉wo꞉ kulufeya꞉sen. 4 Ko꞉sega nilo꞉ gasili Gode eyo꞉ nimo꞉wo꞉ ha꞉fo꞉ disa꞉laki, sagale alita꞉sen ko꞉lo꞉, nio꞉ a꞉ma꞉la꞉ gasili. Nio꞉ man digalo꞉le dimida꞉lena gasilima ko꞉sega, Godeya꞉yo꞉ nio꞉ nofolo꞉ alitaki, gasili ko꞉lo꞉ ene Mama a꞉ma꞉ halaido꞉ iliki, nio꞉ to꞉go꞉de alifa꞉ ko꞉lo꞉, nio꞉ ho꞉gi a꞉sa꞉la꞉liaki, mela꞉no꞉ ho꞉gi dimi. 6 Nilo꞉ gasili, Ya꞉su Keliso eya ilikiyo꞉, Godeya꞉yo꞉ Ene Mama Malilo꞉ a꞉no꞉, boba dimiaki, niya ko꞉go꞉lu alifelo꞉. 7 Elo꞉ dimido꞉wo꞉ mo꞉wo꞉ we. Godeya꞉ ene kanulo꞉ a꞉ma꞉yo꞉ nio꞉ ene siwa꞉l amio꞉ digalo꞉le ta꞉ta꞉sa꞉ga꞉, ene so꞉wale doma꞉ib. A꞉la꞉galikiyo꞉, nio꞉ mela꞉no꞉ mela꞉no꞉ a꞉no꞉ mada dia꞉no꞉ asulab a꞉no꞉ dimi. 8 To a꞉no꞉ hendele so꞉lo꞉l. Kaluka꞉isale Gode amilo꞉ tilidabu i a꞉ma꞉yo꞉ man nafa halale dimidama꞉no꞉wo꞉, tamindeyo꞉ welo꞉b a꞉la꞉ asuluma꞉ki, giyo꞉ to a꞉no꞉ halale wida꞉bi. Nilo꞉ to wido꞉l we nafale ko꞉lo꞉, to wema꞉yo꞉ tambo asuwa꞉fa꞉ib. 9 Ko꞉sega giyo꞉ mo꞉lo꞉ma kabilo꞉ towa꞉lo꞉ kegab a꞉no꞉lia꞉, ge ma꞉mu i mio꞉ agela꞉sen a꞉no꞉lia꞉, Mosesa꞉ ele saefa꞉ amilo꞉ to kegab a꞉no꞉lia꞉, towa꞉lo꞉ kegab a꞉no꞉ tambo ta꞉ta꞉ga꞉, a꞉le dowa꞉bi. Mo꞉wo꞉ towa꞉lo꞉ kegab a꞉ma꞉yo꞉ fo nafayo꞉ mo꞉helema꞉ib. 10 Sa꞉s us amio꞉, kaluka꞉isale imilig noma꞉yo꞉ towa꞉ kegakiyo꞉ aloba꞉ma꞉no꞉ to sa꞉lalega, giyo꞉ hagugo꞉wo꞉ sa꞉la꞉bi. A꞉la꞉ta꞉ga꞉ emo꞉wo꞉ hagugo꞉ towo꞉ wa꞉ka sio꞉ amio꞉ mo꞉da꞉dalega, gio꞉ kalu a꞉no꞉ fa꞉s dimia꞉bi. 11 Kalu o꞉ngo꞉wo꞉ e asulo꞉ nafaleyo꞉ ta꞉taki, man mogago꞉le dimida꞉lab ko꞉lo꞉, ene mogago꞉ dimido꞉ a꞉ma꞉yo꞉, e mo꞉walila꞉la꞉ga꞉ ta꞉li ko꞉lo꞉lab, a꞉la꞉bo꞉ ge asulab.

12 Ta꞉n ho꞉len amio꞉ ne Nikopolis amisa꞉n a꞉na mesa꞉no꞉ asulo꞉ ko꞉lo꞉, kalu imilig nowo꞉, Atemas eyele, Tikikus eyele gelo꞉wa iliga꞉ta꞉ga꞉yo꞉, giyo꞉ ne a꞉na galima꞉ni bo꞉bo꞉ge ya꞉bi. 13 Abolos o꞉lia꞉ gamani elelo꞉ asulo꞉ kalu, Senas o꞉lia꞉yo꞉ ha꞉na꞉nigalikiyo꞉, a꞉la꞉yo꞉ kelego꞉lo꞉ma dowabena꞉ki, giyo꞉ mada asuwa꞉ta꞉bi. 14 A꞉la꞉ta꞉ga꞉ kelego꞉lo꞉ma kaluka꞉isale iyo꞉ asuwa꞉foma꞉kiyo꞉, Kilit Keliso kaluka꞉isaleya꞉yo꞉ imo꞉wo꞉ halale asuwa꞉ta꞉ melea꞉ki asulo꞉l. Iliyo꞉ a꞉la꞉dimidalikiyo꞉, fo nafa hedaki, ho꞉leno꞉ tambo kelego꞉wo꞉ o꞉li doma꞉ib.

15 Kaluka꞉isale tambo ne o꞉lia꞉lo꞉ sab wema꞉yo꞉ gimo꞉wo꞉ sagalo꞉ towo꞉ iliga꞉tab. A꞉la꞉ta꞉ga꞉ tilidabu kaluka꞉isale ne mili ko꞉lo꞉ gi o꞉lia꞉ sab nol o꞉mo꞉wo꞉lo꞉ sagalo꞉ towo꞉ sa꞉la꞉biyo꞉.

Godeya꞉ ha꞉fo꞉ disalano꞉ gi o꞉lia꞉ dowa꞉biyo꞉.